 Աննա ԲԵԳԼԱՐՅԱՆ
«Չենք լռելու» կազմակերպությունը Հոլանդիայի հայերից տեղեկություն է ստացել, որ ՀՀ սփյուռքի նախարարի խորհրդական Սմբատ Մարտիրոսյանը սփյուռքի նախարարության «Արի տուն» ծրագրին մասնակցել հավակնող յուրաքանչյուր հայ երիտասարդից պահանջում է 80 եվրո: Ինչպես նշում է կազմակերպությունը, խորհրդականն իր գործողությունները բացատրում է նրանով, որ այդ պարագայում «մասնակիցներն իրենց ավելի վստահ կզգան»: Կազմակերպության ակտիվիստները հաղորդում են նաև, որ ստուգել են այդ տեղեկատվությունը, այսինքն` կապվել են Հայաստան այցելած «Արի տուն» ծրագրի մասնակիցների հետ, և նրանք հաստատել են այն փաստը, որ ծրագրին մասնակցելու համար Սմբատ Մարտիրոսյանին վճարել են 80 եվրո: Միևնույն ժամանակ, Մարտիրոսյանը կազմակերպության անդամների հետ զրույցի ժամանակ հերքեց այս տեղեկատվությունը՝ հայտարարելով, թե նման քայլն իր կողմից կլիներ «անբարո»։ Կազմակերպության ակտիվիստները կապվել են նաև սփյուռքի նախարարության Եվրոպայի հայ համայնքների վարչության պետ Հրաչյա Ասլանյանի հետ, որը խոստացել է ճշտել տեղեկատվությունն «Արի տուն» ծրագրի մասնակիցներից, և եթե այն հաստատվի, Ասլանյանը խոստացել է ազատել Մարտիրոսյանին աշխատանքից: Ի՞նչ ասենք: Հայտնի է, որ ծուխն առանց կրակի չի լինում: Ցավոք, ծրագիրը (որը վարչապետ Տիգրան Սարգսյանը գնահատել է որպես «մեր հաջողված ծրագրերից մեկը»), այն բանից հետո, երբ ջրի երես ելան հետաքրքիր մանրամասներ, ավելի շատ մտածելու տեղիք է տալիս: Այսպես, թեև ծրագրի պաշտոնական նպատակը սփյուռքահայ երիտասարդներին Հայաստանի հետ ծանոթացնելն է, նրանց մեջ ազգային ինքնագիտակցություն սերմանելը, հայ ժողովրդի պատմությանը և ավանդույթներին, հայկական ընտանիքին, հայերի հոգեբանությանը ծանոթացնելը, Հայաստանի և սփյուռքի միջև հոգևոր-հոգեբանական մերձեցմանն օգնելը և այլն, սակայն իրականում, ինչ էլ որ ասեն, սա ընդամենը տուրիստական ուղևորություն է պատմական հայրենիք արտոնյալ գներով: Ոչ ավելին, քանզի ի տարբերություն, ասենք, ՌԴ «Հայրենակիցների վերադարձը» ծրագրի, չի հետապնդում ամենակարևոր՝ մեր հայրենակիցներին վերադարձնելու նպատակը... Այնուհանդերձ, հիշեցնենք, որ այս տարի «Արի տուն» ծրագիրը (բարելավված կամ նորացված ձևով, ինչպես հայտարարում էին սփյուռքի նախարարության պաշտոնյաները) մեկնարկում է հունիսին և կտևի մինչև հոկտեմբեր: Ծրագրի ընթացքում 13-20 տարեկան մոտ 800 երիտասարդներ աշխարհի տարբեր ծայրերից Հայաստանում կհյուրընկալվեն հայկական ընտանիքներում: Իսկ դրա իրականացման համար ՀՀ պետբյուջեից կհատկացվի 75 մլն դրամ:
|
