Հունվարի 24-ն Իսրայելի հայկական համայնքի պատմության մեջ գրանցվեց որպես բացառիկ պատմական օր: Միանգամից երկու կարևոր իրադարձություններ տեղի ունեցան: Հայոց Ցեղասպանության 100-ամյակի հանձնախմբի նախաձեռնությամբ պաղեստինա-իսրայելյան սահմանագծում գտնվող հայկական Պարոն Տեր կալվածքում առավոտյան տեղի ունեցավ ծառատունկ նվիրված հայոց Ցեղասպանության անմեղ զոհերի հիշատակին: Ընդհանուր առմամբ տնկվեց 340 մատղաշ ձիթենի: Շտապենք տեղեկացնել, որ սա իր տեսակի մեջ յուրահատուկ միջոցառում էր և ողջ սփյուռքում առաջին անգամ էր նման միջոցառում կազմակերպվում: Սակայն մինչ ծառատունկ սկսելը տեղի ունեցավ փոքրիկ միջոցառում: Ներկա էին մի շարք հոգևորականներ: Բացման խոսքով հանդես եկավ Երուսաղեմի Հայոց Պատրիարքարանի միջեկեղեցական և արտաքին հարաբերությունների բաժնի վարիչ Արիս արքեպիսկոպոս Շիրվանյանը: Ներկաները հիմնական երկրի տարբեր շրջաններից ժամանած հայերն էին և պատրիարքարանի հոգևորականները: Վատառողջության պատճառով Հայոց Պատրիարքը չմասնակցեց ծառատունկին, որով էլ հավանաբար պայմանավորված մյուս պատրիարքարաններից ներկայացուցիչներ չկային:
Լուսանկարում՝ Հայոց Պատրիարքարանի պատվիրակությունն և հյուրերը
Այստեղ հանդիպեցինք Իսրայելում ՀՀ պատվո հյուպատոս պարոն Ցոլակ Մոմջյանին և Իսրայելում հայտնի հեռուստալրագրող, հայասեր Յակով Արխիմեիրին, որն էլ շատ շնորհակալություն հայտնեց հրավերքի համար: Նա մասնավորաբար հույս հայտնեց, որ Իսրայելում անցկացվելիք պառլամենտական ընտրություններից հետո նոր կառավարությունը պաշտոնական պատվիրակություն կուղարկի Հայաստան՝ մասնակցելու Հայոց Ցեղասպանության 100-ամյակին նվիրված միջոցառումներին, ինչպես նաև պաշտոնապես ի վերջո կճանաչի Հայոց Ցեղասպանությունը:
Լուսանկարում՝ հայտնի հրեա հեռուստալրագրող՝ Յակով Արխիմեիրը
Ելույթներն ընդմիջվում էին հայկական ազգային գործիքների՝ դուդուկի ու շվիի տխուր երաժշտությամբ, որը կատարեց Ժառանգավորաց վարժարանի սան Նարեկը:
Լուսանկարում՝ Երուսաղեմի Ժառանգավորաց վարժարանի սան
Նարեկը դուդուկ նվագելիս
Հայոց Ցեղասպանության 100-ամյակի հանձնախմբի անունից հանդես եկավ Հակոբ Անդրեասյանն, որն իր խոսքում կարևորեց հանձնախմբի կատարած աշխատանքն ու առանձնացրեց հայոց պահանջատիրության հիմնախնդիրը:
 Լուսանկարում՝ ՌԱԿ-ի Երուսաղեմի ատենապետ Հակոբ Անդրեասյանը
Հանդիսավոր արարողությունից հետո ծառերը բաժանվեցին հայերին, որոնք էլ սկսեցին ծառատունկը:
Լուսանկարում՝ «Նաիրի» միության անդամները ծառատունկի ժամանակ
Պետախ Տիկվայի իսրայելահայերի «Նաիրի» միության նախաձեռնությամբ տեղի ունեցավ նաև փոքրիկ մոմավառություն՝ ի հիշատակ հունվարի 12-ին Գյումրիում տեղի ունեցած սպանդի զոհ դարձած Ավետիսյանների ընտանիքի հոգիների լուսավորության համար, որն ի կատար ածեցին Երուսաղեմի Հայոց Պատրիարքարանի հոգևորական, Հայոց Ցեղասպանության 100-ամյակի հանձնախմբի Պատրիարքարանի ներկայացուցիչ հայր Կորյուն վարդապետ Բաղդասարյանն ու մի խումբ ժառանգավորներ:
Լուսանկարում՝ հայ հոգևորականներն ու ներկաներն աղոթում են
Ավետիսյանների հոգիների լուսավորման համար
Մոտ 40 մարդ մասնակցեց այս արարողությանն, որին հաջորդեց մոմավառությունն ու Ավետիսյանների սպանված յուրաքանչյուր անդամի համար անհատական, անվանական ձիթենիների տնկմամբ:
Լուսանկարում՝ Ավետիսյանների հրեշտակացած ընտանիքի նկարների դիմաց հայ երիտասարդները կակաչներ են դնում ու մոմեր վառում
Այժմ ի շնորհիվ Նաիրիականների Սուրբ Հողում՝ Երուսաղեմում, Ավետիսյանների ընտանիքի հոգիների հանգստության համար յոթ ձիթենի տնկվեց՝ ի նշան այս ընտանիքի հավերժության......
Իսկ երեկոյան Երուսաղեմի ժառանգավորաց վարժարանի սրահում տեղի ունեցավ դասախոսություն, որը կազմակերպվել էր կրկին Ցեղասպանության հանձնախմբի կողմից: «Արևմտյան Հայաստանն այսօր» խորագրով դասախոսությունը հյուրերին ներկայացրեց ամերիկահայ պատմաբան ու դասախոս Ռիչարդ Հովհաննիսյանը:
Նյութը պատրաստեց Արտյոմ Չերնամորյանը
| 
