|
Իսրայելում Ֆրանսիայի արտակարգ և լիազոր
Դեսպան Պրն. Քրիստոֆ Բիգոյին
Իսրայելահայերի Պետախ-Տիկվայի
«Նաիրի» միության հիմնադիր կազմի անունից
Շ Ն Ո Ր Հ Ա Կ Ա Լ ՈՒ Թ Յ ՈՒ Ն
Ֆրանսիայի խորհրդարանի վերին պալատը` Սենատը հավանություն տվեց Ֆրանսիայի կողմից ճանաչված Ցեղասպանությունների ժխտումը քրեականացնելու մասին օրինագծին, որով ևս մեկ անգամ ապացուցեց, որ այս պետությունն աշխարհում այն եզակի երկիրն է, որը ճշմարտության, ազատամտության և մարդու իրավունքների պաշտպանության օրրանն է համարվում:
Թույլ տվեք մեջ բերել Հայաստանի Հանրապետության արտաքին գործերի նախարար Էդվարդ Նալբանդյանի ելույթից մի հատված, որով նա իր երախտագիտություն Է հայտնում Ֆրանսիայի իշխանություններին, Սենատին և ժողովրդին.
«Այս օրը ոսկե տառերով կգրվի ոչ միայն ֆրանսիացի և հայ ժողովուրդների բարեկամության պատմության մեջ, այլև աշխարհում մարդու իրավունքների պաշտպանության տարեգրքում և կլրացնի մարդկության դեմ հանցագործությունների կանխարգելման առկա մեխանիզմները։ Ֆրանսիան վերահաստատեց իր առանցքային դերակատարությունը որպես համամարդկային արժեքների անշահախնդիր պաշտպան», - ասված է, մասնավորապես, Հայաստանի արտգործնախարարի հայտարարության մեջ»:
Իսրայելահայերի Պետախ-Տիկվայի «Նաիրի» միությունն Իսրայելի Արդարադատության նախարարությունում գրանցվել է 2005թ. – ին և միավորում է ոչ միայն հայերին, այլև Իսրայել մշտական բնակության հաստատված նախկին Հայաստանաբնակ հրեաներին: Կազմակերպության նպատակն է ամրապնդել կապը հայ և հրեա ժողովուրդների ու երկու պետությունների միջև: Առաջնային է համարվում նաև հայոց լեզվի և մշակույթի պահպանության հարցն, ինչպես նաև Երուսաղեմի Հայոց պատրիարքարանի ու համայնքի հետ համատեղ տարբեր ազգային ծրագրերի իրականացումը: Բազմաթիվ ծրագրեր են կյանքի կոչվել արդեն ու կան շատ նոր նախագծեր:
Ֆրանսիան, որպես ժողովրադավարության ու ազատասերության մի երկիր, փայլուն օրինակ կարող է հանդիսանալ նաև մյուս երկրների համար, որոնք ոչ միայն պետք է ընդունեն 20-րդ դարի սկզբին տեղի ունեցած հայկական ողբերգությունն, այլ պետք է նույնանման օրենք ընդունեն՝ կանխելով ապագայում նման ոճրագործությունների հնարավոր ծնունդը:
Իսրայել պետության պատմության մեջ առաջին անգամ Հայոց Ցեղասպանության ճանաչման բանաձևն անցյալ տարեվերջին քննարկվեց Քնեսսետի կրթության և գիտության հանձնաժողովում, որով առաջին անգամ փորձ արվեց հասարակության բոլոր խավերին լսելի դարձնել խնդիրը: Հուսով ենք, որ Իսրայելն էլ կհետևի Ֆրանսիայի օրինակին ու առաջնորդվելով համամարդկային արժեքներով, ի վերջո կճանաչի Հայոց Ցեղասպանությունը:
Հարգելի դեսպան, պրն. Բիգո՝ խնդրում ենք Ձեզ մեր հասարակական կազմակերպության և ողջ իսրայելահայերի անունից փոխանցեք մեր շնորհակալությունն ու երախտիքի խոսքերն Ֆրանսիայի ժողովրդին, Սենատին, կառավարությանն ու մասնավորապես երկրի նախագահ Նիկոլա Սարկոզիին:
Հայաստանի Հանրապետությունում այսուհետ հայերն իրենց նորածին երեխաներին կոչում են Ֆրանսիայի հերոսների ու նախագահ Սարկոզիի անուններով:
Աստված պահպանի Ձեզ և Ֆրանսիան.........
Պետախ-Տիկվայի իսրայելահայերի «Նաիրի» միության հիմնադիր կազմ
25.01.2012թ.
| 
