Օգոստոսի 2-ին Հայաստանի մինչև 19 տարեկանների հավաքականը ժամանել էր Թել-Ավիվ: Մեր թիմը հանգրվանել էր «Կիբուց Շֆայիմ» հյուրանոցում: Օգոստոսի 3-ին և 5-ին՝ Երևանի ժամանակով ժամը 19:00-ին, Հայաստանի մինչև 19 տարեկանների հավաքականը երկու ընկերական հանդիպում անցկացրեց Իսրայելի մինչև 19 տարեկանների հավաքականի հետ: Հանդիպումները տեղի ունենան Իսրայելի ազգային մարզումային կենտրոնի մարզադաշտում: Հայաստանի ֆուտբոլի մինչև 19 տարեկանների հավաքականի գլխավոր մարզիչ Մարկ Լելիևրի գլխավորությամբ Իսրայել էին մեկնել 18 ֆուտբոլիստներ:

Օգոստոսի 3-ին երեկոյան տեղի ունեցավ երկու հավաքականների անդրանիկ խաղը՝ Թել Ավիվի Իսրայելի ազգային մարզումային կենտրոնում: Այն ավարտվեց Իսրայելի հավաքականի հաղթանակով՝ 4:0 հաշվով: Հայաստանի հավաքականը հանդես էր գալիս հետևյալ կազմով ՝ 1. Սուրեն Ալոյան 2. Հակոբ Համբարձումյան 3.Արթուր Քարտաշյան 4.Աղավարդ Պետրոսյան 5.Հակոբ Հակոբյան (ա) 6.Գոռ Աղբալյան 7.Հայկ Գալստյան 11.Հովհաննես Իլանգյոզյան 14.Էդգար Մովսիսյան 21. Արթուր Նադիրյան 22.Գրիգորի Էմեկսուզյան: Գլխավոր մարզիչ՝ Մարկ Լելևր:

Այս թիմերի միջև հաջորդ հանդիպում տեղի ունեցավ օգոստոսի 5-ին կրկին Թել Ավիվում՝ Իսրայելի ազգային մարզումային կենտրոնում: Իսրայելի և Հայաստանի մինչև 19 տարեկանների հավաքականների միջև ընկերական երկրորդ հանդիպումը շատ գրավիչ ու գոլառատ ստացվեց: Առաջին խաղակեսն ավարտվեց 1:0 հաշվով հօգուտ Իսրայելի հավաքականի: Երկրորդ խաղակեսում իսրայելցիները ևս 2 անգամ գրավեցին մեր հավաքականի դարպասը՝ հաշիվը դարձնելով 3:0: սակայն, մեր երիտասարդ ֆուտբոլիստները չընկճվելով կարողացան դրսևորել կամային բարձր հատկանիշներ և փրկել հանդիպումը: Նախ Հակոբ Համբարձումյանը հաշիվը դարձրեց 3:1, ապա Հայկ Գալստյանը՝ 3:2, իսկ հանդիպման վերջակետը դրեց Վարդան Սաֆարյանը: Իսրայել Մ-19-Հայաստան Մ-19՝ 3:3:

Ցավոք սրտի Իսրայել ժամանած հայ ֆուտբոլիստները շատ հազվադեպ են տեղեկացնում այս կամ այն ուսումնական հավաքի ու ընկերական խաղերի մասին, որով պայմանավորված գրեթե հայ ֆուտբոլասերներ չեն մասնակցում այս խաղերին: Վերջին անգամ Գյումրիի «Շիրակ»-ի խաղին հայ երկրպագուները մասնակցեցին ու ցավոք սրտի գլխիկոր հեռացան մարզադաշտից: Ցավալի է, բայց մինչև օրս ոչ մի պաշտոնական հանդիպում Իսրայելում չի ավարտվել հայ ֆուտբոլիստների հաղթանակով, սակայն սա չի նշանակում, որ մենք հայկական դրոշներով չենք սատարելու մեր ֆուտբոլիստներին....

Նյութը պատրաստելու համար օգտագործվել են ՀՀ Ֆուտբոլի ֆեդերացիայի պաշտոնական կայքի տեղեկությունները: