Լուսանկարները վերցված են  լրատվական              գործակալությունից

           Իսրայելի Հայֆա քաղաքից մեր ընթերցող ու նամակագիր Նուբար Ասլանյանը տեղեկացնում է, որ Գազայի հատվածում շարունակվող պատերազմի հետեւանքով հրթիռակոծվող իսրայելական Բեեռ Շեւա քաղաքում ապրում է Հայաստանից ներգաղթած 15 ընտանիք, այդքան էլ բնակվում է Իսրայելի հարավում հրթիռակոծվող Կիրյատ Գատ, Աշդոդ, Աշկելոն քաղաքներում: Իսրայելի կառավարությունը «թեժ գիծ» է ստեղծել եւ մի քանի լեզուներով կապ է հաստատում բնակիչների հետ` ցուցաբերելով հոգեբանական եւ այլ օգնություններ: Հայերեն ծառայությունն իրականացնում է ինքը` Պետախ Տիկվա քաղաքի «Նաիրի» միության նախագահ Արտյոմ Չերնամորյանի հետ: Բեեռ Շեւայում կազմակերպչական աշխատանքներ է տանում Լեւոն Սուքիասյանը: Նշյալ ընտանիքների մեծ մասը ցանկանում է ժամանակավորապես տեղափոխվել Հայաստան, սակայն անձնագրային խնդիրներ ունենալու պատճառով չի կարողանում: Հայկական անձնագիրը վավերական չէ, իսկ իսրայելականով գալու դեպքում մուտքի վիզայի համար պետք է վճարել:

Ասլանյանը նշում է, որ հայաստանցիները օգնություն ստանալու նպատակով առայժմ չեն դիմել Երուսաղեմի հայոց պատրիարքարանին եւ Հայաստանի պատվո հյուպատոսու-թյանը: Ինքը կարող էր Հայաստանից աջակցություն ստանալու հարցերը կարգավորել, բայց հիշելով 2006 թվականին լիբանանյան պատերազմի ժամանակ Հայաստանում օթեւան ստանալու «թռիչքային» տառապանքները, նախընտրում է սպասել իրադրության կարգավորմանը, քան դիմել հայաստանյան իշխանություններին:

Երեկ գիշեր «Ազգ»ը Բեեռ Շեւայից ստացավ էլ-նամակ, որը հաստատում է հայերի ներկայությունն այնտեղ. նրանց մեջ կան ուսանողներ:

Ռ. Պ

«ԱԶԳ» ՕՐԱԹԵՐԹ #5, 2009-01-17