|
Այնպես է ստացվել, որ այս տարի մինչև Վարդավառ ընկած քրիստոնեական տոները հին ու նոր տոմարով համընկել են, ուստի թե Էջմիածինն ու թե Երուսաղեմը տոները միևնույն ժամանակ են նշում:
Շաբաթ երեկոյան Երուսաղեմում նախատոնակով սկսվեց Քրիստոսի պայծառակերպության տոնն, իսկ այնուհետև ժամերգությամբ, հսկման արարողությամբ ու առավոտյան պատարագով շարունակվեցին եկեղեցական հիմնական արարողություններն, որոնք ավարտվեցին կիրակի կեսօրին: Սովորաբար նման տոներին պատարագներն անցկացնում է Երուսաղեմի Հայոց պատրիարքը, սակայն վատառողջության պատճառով հայոց պատրիարքի փոխանորդ, լուսարարապետ Նուրհան արքեպիսկոպոս Մանուկյանի գլխավորությամբ տեղի ունեցան բոլոր արարողությունները: Վարդավառն Երուսաղեմում նաև մեր աթոռի գլխադիր առաքյալի, Հակոբոսի տոնն է, քանի որ Թաբոր լեռան վրա Հիսուսի ընտրած երեք աշակերտից մեկն՝ ինքն էր, ով ներկա էր պայծառակերպության հրաշքին:
Երուսաղեմահայերը մեծ շուքով տոնեցին Քրիստոսի պայծառակերպության տոնն, որն Հայ Առաքելական եկեղեցու հինգ տաղավար տոներից մեկն է: Ավանդաբար Հայոց Պատրիարքարանում Վարդավառի տոնի ժամանակ էին կատարվում հոգևորականների ձեռնադրությունը: Հոգևոր արարողություններից զատ նաև աշխարհիկ դասը հայկական թաղամասի ներսում մասնակցեց տոնին՝ դպրոցականներն ու երիտասարդները միմյանց վրա ջուր էին ցողում, որին անտարբեր չէին կարող վերաբերվել հետաքրքրասեր զբոսաշրջիկները: Ի տարբերություն Երուսաղեմի, մյուս հայաշատ քաղաքներում օրն սովորական էր ու աշխատանքային: Թե հյուսիսային Հայֆան ու կենտրոնական Թել-Ավիվ- Յաֆֆոն ու Պետախ-Տիկվան ավանդաբար Երուսաղեմյան տոնակատարություններից մեկ շաբաթ անց են նշում տոնը Յաֆֆոյի Սրբ. Նիկողայոս վանքում: Վարդավառի հաջորդող երկուշաբթի օրը մեռելոց է:
Հարգելի հայրենակիցներ հաջորդ շաբաթ Յաֆֆոյի Սրբ. Նիկողայոս վանքում պատարագ կմատուցվի ու նաև Վարդավառը կնշվի առավոտյան:
|
