Главная » 2011»Май»25 » «Քնեսեթի որոշումը մոտեցնում է Իսրայելի կողմից Հայոց ցեղասպանության ճանաչման օրը»
«Քնեսեթի որոշումը մոտեցնում է Իսրայելի կողմից Հայոց ցեղասպանության ճանաչման օրը»
00:38
23.05.2011 Արտյոմ Չերնամորյան, Երուսաղեմ Անցած շաբաթ Քնեսեթի կայացրած որոշումը մոտեցնում է Իսրայելի կողմից Հայոց ցեղասպանության ճանաչման օրը: «Ազատություն» ռադիոկայանի հետ զրույցում այսպիսի կարծիք հայտնեց Հայ դատի Երուսաղեմի մասնաճյուղի պատասխանատուներից մեկը` Հակոբ Սեւանը:
Անցած չորեքշաբթի օր Իսրայելի խորհրդարանը որոշեց Հայոց ցեղասպանության ճանաչման հարցը քննարկել Քնեսեթի կրթության եւ գիտության հանձնաժողովում:
Նախորդ տարիներին հարցը միայն օրակարգում էր հայտնվում, այնուհետեւ ընդհանուր քննարկումների արդյունքում հայտնվում էր պաշտպանության եւ արտաքին հարաբերությունների հանձնաժողովում, որտեղ էլ թուրք-ադրբեջանական լոբբիի ազդեցության եւ երկրի արտգործնախարարության ճնշումների ներքո չէր քննարկվում արդեն երեք տարի շարունակ:
Հակոբ Սեւանի փոխանցմամբ` Քնեսեթի մայիսի 18-ի քննարկումների ընթացքում «խոսք եղավ, որ այսօր արեւմտյան աշխարհում Իսրայելը գրեթե վերջիններից է, որ մինչ օրս չի ընդունել Հայոց ցեղասպանության հարցը»: Բացի այդ, ինչպես ընդգծեց Հայ դատի հանձնախմբի ներկայացուցիչը, «այսօր Թուրքիա - Իսրայել հարաբերությունները օրեցօր ավելի վատ վիճակ են ստանում»: «Եվ այս բոլորը իրար հետ գումարած` ինքը պատճառը պատմական, բարոյական, Իսրայելի բարոյական դիմագիծն է, որ այսօր կուզենք ավելի լավ ձեւով ներկայացնել` այն է, որ կկարծեմ, որ այսօր այս քայլին գնաց Իսրայել», - ասաց Հակոբ Սեւանը:
Քնեսեթում քվեարկությանը մասնակցած 20 պատգամավորներն էլ կողմ են արտահայտվել ոչ միայն բանաձեւի նախագիծը օրակարգում ընդունելուն, այլեւ այն կրթության եւ գիտության հանձնաժողով տեղափոխելուն:
Թուրքական մամուլը եւ հեռուստատեսությունը նույն օրը անդրադարձան Քնեսեթի այս որոշմանը` խիստ քննադատելով Իսրայելի պատգամավորների այս քայլը:
Հայ դատի հանձնախմբի մեկ այլ անդամ` պատմական գիտությունների թեկնածու Ժորժետ Ավագյանը «Ազատություն» ռադիոկայանին փոխանցեց, որ այժմ հսկայածավալ նյութ է հավաքվելու Քնեսեթին ներկայացնելու համար:
Իսկ այս պահին շնորհակալական նամակներ են պատրաստվում` հրեա այն պատգամավորներին ուղարկելու համար, որոնք արտահայտվեցին պատմական արդարությունը վերականգնելու օգտին:
Շատ իսրայելահայեր էլ ակնկալում են Հայաստանի կառավարության, Ազգային ժողովի եւ արտգործնախարարության արձագանքը:
